नवोदित कवी गीतकार पंडित निंबाळकर यांची शेतकरी जीवनावर आधारित सुंदर कविता
देह मायेचा झिजला
फाळ नांगराचा शिरे
काळजात आरपार
देह मायेचा झिजला
तेंव्हा पिकलं शिवार ||१||
माती ढेकळाची होई
रानं मऊसर दिसे
बैल जुंपू पांभरीला
मुठ चाड्यावर हसे ||२||
मागे किडे खाण्या येती
फौज घेऊन बगळे
बाळ झोक्यातून पाहे
कसे? राबती सगळे ||३||
औत हाकता म्हणतो
सर्जा राज्याची हो गाणी
संगे शिवार डोलता
नभ गाळतो रे पाणी ||४||
रूते धस्कट पायात
सांडे मातीत रगत
विडा चावून बांधतो
चिंधी फाडून पायात ||५||
गेली दमून सांजेला
पळ काढती घराला
रानं निजले काळोखी
दाणे अंकुरे तासाला ||६||
नको घाबरू तू धन्या!
आला बहर तुऱ्याला
काळ्या मायेची ही कुस
सुख घालते जन्माला ||७|l
कवी पंडित निंबाळकर
मु पो सांगवी भुसार ता कोपरगाव
जि अहमदनगर ७९७२५२३७१७
